22 dic. 2014

Peor imposible...con Peter Punk

Despedimos o 1º trimestre coa actuación dun dos pallasos máis coñecidos (e recoñecidos) do país: Peter Punk. O artista achegounos o seu espectáculo Peor Imposible co que conseguiu sacarnos máis dun sorriso co seu humor e artes circenses. Iso sí, máis dun e dunha levou, como agasallo prenavideño, unha pequena molladura.



Ademais, aproveitouse o acto para rendir homenaxe aos catro alumnos de bacharelato que foron premiados no concurso de Igaciencia.



18 dic. 2014

Coñecérmonos o noso: Aciveiro e o Candán

     A menos de unha ducia de quilómetros do Instituto temos un patrimonio excepcional, tanto no arquitectónico como no natural. O mosteiro de Aciveiro e a serra do Candán son dous lugares que teñen moito que dicir sobre a nosa historia, e sobre a beleza da nosa paisaxe.
    Por iso o alumnado de PDC do IES fixo o pasado 24 de novembro unha visita a estes lugares para aproveitar o preto que estamos destes espazos privilexiados para poder poñer rostro e nome a moitos dos conceptos que estamos a estudar en historia, xeografía, arte, etc.... Así, no mosteiro puidemos apreciar diferentes estilos arquitectónicos que foron sedimentando a través do tempo, en diferentes estratos, o que hoxe podemos contemplar. O senlleiro románico da igrexa é alterado por elementos góticos (a porta da sacristía) ou barrocos (retablo) e mesmo neoclásicos como a fonte do claustro.
    A sociedade daquela época amosouse aos nosos ollos filtrándose baixo as restauracións que sufriu o mosteiro. O feudalismo, as rendas dos mosteiros, as actividades autárquicas e mesmo cara o mercado como é o caso da venda de neve, o esplendor da Galiza do século XII e XIII, a decadencia dos séculos posteriores. Mesmo atopamos ao mestre da escolástica, Tomé de Aquino, un dos filósofos máis relevantes da historia, presidindo o retablo.
    Hai dous sepulcros na nave da igrexa. Un nobre que dá conta do xeito de comprar o ceo que tiña esta clase social, e outro atribuído ao abade Gonzalo das Penas. Este debeu ser un bo gobernante do mosteiro que mesmo foi canonizado como santo. Entre as súas obras puidemos apreciar a fermosa ponte de Andón, enclavada nun entorno recollido e poboado de árbores senlleiras, que fan esta unha das máis apreciadas das moitas que ten o río Lerez até a súa chegada a Pontevedra.
Logo de visitar as pontes colleumos rumbo cara o cumio do Candán. Íamos a busca das neveiras. Unha produción característica desta zona, a neve, que tantos beneficios deu noutros tempos. Non foi doado, máis ao fin atopamos estes recintos empedrados nos que se ía recollendo a neve até que ben prensada, convertida en xeo, era exportada ás cidades galegas e mesmo as doutros lugares da península.



 
 Foi unha xornada breve pero intensa de coñecer máis do que temos no Concello no que está encravado o noso IES. Ás veces non hai que ir moi lonxe para atopar grandes monumentos nin paraxes fermosos. Cómpre abrir os ollos ao noso entorno e valorar o que posuímos.

13 dic. 2014

Premiados por IGACIENCIA!

A Comunidade educativa do Chano Piñeiro está de noraboa xa que dous grupos de alumnos e alumnas do noso instituto conseguiron o segundo premio nos dous concursos convocados por IGACIENCIA co gallo da celebración do Día da Ciencia en Galego 2014. Por este motivo, onte acudiron á Coruña a recoller os seus galardóns e presentar os seus traballos.
@s alumn@s premiad@s co seu profesor Manuel Andújar
Imaxe: Faro de vigo
No concurso Inventa en Galego, os alumnos de 1º de Bacharelato Gabriel Otero, Gabriel Sieiro, Claudio Troitiño e Daniel Varela foron premiados polas súas aplicacións para móbil RuralApp e ForcareiTour coas que podemos buscar información, respectivamente, sobre as casas de turismo rural de Forcarei e sobre lugares de interese turístico da comarca.


Por outra banda, no concurso Sensores para todos  os alumknos e alumnas de 4º PDC foron premiados polo seu traballo de medición do tempo de reacción simple ante estímulos visuais e sonoros e que xa nos presentaran no Día da Ciencia en Galego que celebramos no instituto o 4 de novembro.


Seguiremos informando...



2 dic. 2014

Exposición fotográfica: A horta e o xardín do IES

Tamara , autora das fotografías

Durante as últimas semanas tivemos a oportunidade de disfrutar no noso centro dunha exposición formada por unha serie de fotografías realizadas pola alumna de 4º ESO, Tamara Álvarez no curso pasado sobre a Horta e o xardín do instituto.
As imaxes da mostra foron utilizadas na elaboración do herbolario do IES e na elaboración da memoria do traballo presentado ao I Premio Nacional de Huertos escolares ecológicos de España.

Vista Panorámica da Exposición


25 nov. 2014

Día Internacional contra Violencia de Xénero

Hoxe 25 de novembro é o Día Internacional contra a Violencia de Xénero e da man da Biblioteca do IES quixemos sumarnos á loita contra  esta lacra da sociedade actual.

Así, a carón dunha exposición na que, a través de letras de cancións, propoñemos unha reflexión sobre diferentes aspectos relacionados co maltrato (podedes acceder a ela premendo na imaxe), aparecen estes carteis elaborados polo alumnado de Informática de 4º ESO:


Por último, deixámosvos este vídeo creado polos amigos de Trafegando Ronseis no que se advirte sobre unha nova forma de maltrato a través das novas tecnoloxías e que está a afectar cada vez máis ás adolescentes e xente nova.


18 nov. 2014

De excursión científica...

O pasado xoves 13 de novembro o alumnado de 4º ESO e 1º Bacharelato desprazouse a Santiago de Compostela para  facer unha dobre visita. Por unha banda, acudiron ao Museo de Historia Natural onde, entre sala e sala, mergulláronse nas ciencias naturais disfrutando da biodiversidade terrestre e mariña e da xeodiversidade.  Posteriormente, achegámonos á Galería Sargadelos para visitar a exposición Arte e Ciencia organizada por Igaciencia e na que lles explicaron a íntima relación existente ao longo dos séculos entre a arte e a matemática. Desde Juan Gris ata Picasso pasando por Escher, Vasarely ou pola arte matemática do século XXI baseada na impresión 3D.



En definitiva, unha saída didáctica do máis atractiva e que serviu de complemento ao vivido durante o Día da Ciencia en Galego!

12 nov. 2014

Día da Ciencia en Galego (e III)

Aínda que queda algunha sorpresa máis por mostrarvos sobre o que fixemos co gallo da celebración do Día da Ciencia en Galego (permanecede atentos nos vindeiros días...), velaquí tedes o vídeo resumo da actividade.  Disfrutádeo!




A música, un ano máis, corre a cargo dos amigos de NAO co seu tema Cartas no caderno. Desde aquí queremos agradecerlle a súa colaboración prestándonos os seus acordes!

5 nov. 2014

Día da Ciencia en Galego (II)

Resulta moi gratificante comprobar como ano tras ano o noso Día da Ciencia afiánzase e vai collendo, se cabe, mellor cor. Cambiamos a ubicación da actividade ao salón de actos e resultou todo un acerto. Convidamos aos nenos e nenas do CEIP Nosa Señora das Dores a que se pasaran por alí e, só con verlles a cara de entusiasmo, interese e agradecemento, pagou a pena. Houbo novidades, si, pero sempre coa mesma esencia: achegar a ciencia ao noso alumnado e, como non, reivindicar o dereito a usar a nosa lingua no ámbito científico.

DÍA DA CIENCIA EN GALEGO 2014
Desde o dpto. de Bioloxía ensináronnos como facer desaparecer o plástico, faláronnos do pH e do efecto da chuvia áceda nas rochas carbonatadas e achegáronnos ao Proxecto Ríos; o dpto. de Música preparounos un concerto cos copas de cristal despois de explicarnos a relación entre as ondas e a música; o dpto. de Matemáticas descubriunos a maxia da banda de Moëbius, desde o dpto de Tecnoloxía puxeron a proba os nosos reflexos e mediron o noso tempo de rección ante estímulos sonoros e visuais cun sensor de infravermellos e, por último, o dpto. de Lengua Española falounos da presenza de Isaac Newton na literatura.

VISITA DOS NEN@S DO COLE
Nos vindeiros dias iremos publicando distintas cousas relacionadas con este día pero, polo de agora, deixámosvos algunha das imaxes da xornada.






Só nos queda darlle as grazas a todo o profesorado e alumnado que participou e se implicou na actividade. Para o ENDL é un orgullo contar coa vosa colaboración! 

2 nov. 2014

Día da Ciencia en Galego 2014 (I)


Como temos por costume nos últimos anos, unímonos a esta convocatoria de IGACIENCIA. O vindeiro martes 4 de novembro, o EDLG será o encargado de coordinar esta actividade na que pretendemos achegar a ciencia ao noso alumnado usando a nosa lingua. 

O formato será o habitual destes anos (2011, 2012, 2013): unha serie de obradoiros temáticos desenvolvidos e impartidos polo propio alumnado que serán os encargados de explicar os contidos aos seus compañeiros e compañeiras. Como actividade multidisciplinar que é, son varios os departamentos didácticos implicados e aos que, desde aquí, queremos agradecer a súa colaboración. Os obradoiros deste ano serán:

  • Sensores e tempo de reacción (Dpto. de Tecnoloxía) 
  • Ondas estacionarias na música (Dpto. Música)
  • Isaac Nexton na literatura (Dpto. Lingua Española)
  • A maxia da banda de Moëbius (Dpto. de Matemáticas)
  • Química e bioloxía  (Dpto. Bioloxía) 

Por outra banda, elaboramos dous carteis homenaxeando á figura dos dous persoeiros aos que se lle rinde tributo este ano: o físico Isaac Newton e o matemático de Bermés, Xosé Rodríguez. Estes carteis serán colocados a carón dos dos diferentes científicos aos que se lle dedicou esta cita nos últimos anos e que, pouco a pouco, van formando o noso corredor da Ciencia. Estes carteis fixéronse en colaboración co ENDL do IES Pintor Colmeiro de Silleda.

     





31 oct. 2014

Noite de Samaín


Esta noite é noite de Samaín, a festividade celta na que se celebra o final da tempada da colleita e que marcaba o inicio do Aninovo Celta. Na seguinte presentación, elaborada pola Biblioteca en colaboración co ENDL, poderedes coñecer un pouco máis esta celebración así como a súa relación con outras festividades como a Noiteboa ou o San Martiño...

24 oct. 2014

Día das Bibliotecas

Hoxe, 24 de outubro, celébrase o Día das Bibliotecas Escolares e así nolo quixeron lembrar desde a nosa con estes paneis informativos.



Ademais, e tendo en conta que nesta ocasión este día tan especial está dedicado ao mundo das matemáticas, elaboraron, en colaboración coa biblioteca do IES Laxeiro de Lalín,  unha guía de lecturas matemáticas tridimensional en forma de cubo de nome Letras Cúbicas na que o Equipo de Normalización colaborou tanto no propio deseño como coa aportación dos poucos títulos que hai en galego deste tipo de lecturas. 


Letras Cúbicas:  Formato 3D



Letras Cúbicas: Formato Estándar

10 oct. 2014

Ollos de Aula nº 16

Benvid@s ao curso 2014/2015!  Agárdannos moitos meses por diante para seguir aportando o noso graniño de area en prol de dinamizar a nosa lingua. E que mellor maneira para iniciar o novo curso co número 16 da revista Ollos de Aula que edita a Coordinadora Galega de ENDL.




25 jun. 2014

E isto é todo!

Chegamos ao remate do curso 2013/2014 tras moitas horas de traballo e damos por pechado este capítulo. Agora toca tomarse un par de mesiños de descanso (que boa falta fan!), relaxar a mente, reinventarse e prepararse para volver con forza a partir de setembro.

E, como despedida, aquí vos deixamos o boletín dixital de Lingua de Montes onde se resume este curso do EDLG en imaxes e palabras. Unha publicación sinxela, humilde, pero que nace coa intención de ir mellorando ano a ano, paseniño, e coa esperanza de que vaia medrando coas vosas aportacións.



Boas e merecidas vacacións tod@s!

24 jun. 2014

Visita a Celanova

O xoves día 19 de xuño o alumnado de 3º ESO e 1º de Bacharelato achegáronse á fermosa vila de Celanova para realizar o Roteiro Curros Enríquez que coordina a fundación que leva o seu mesmo nome. Esta é a crónica da viaxe:

    A rota dou comezo na Vilanova dos Infantes (das Infantas segundo Ferrín e Celso Emilio). Lugar de nacemento do autor de Arraianos e espazo no que se desenvolve unha das lendas cantadas por Curros que deu coñecer a este autor: A virxe do CristalDon Adolfo Enríquez, o crego que custodia a devandita imaxe, con paciencia e amabilidade relatounos a súa historia e os misterios que a rodean. E cando xa nos íamos a casualidade levounos a descubrir outra xoia coa que non contábamos, un cristo crucificado do século XII. Quizais a obra máis valiosa da imaxinería románica galega.
    Xa en Celanova visitamos pola mañá o Mosteiro e a igrexa mozárabe. Tivemos ocasión de viaxar no tempo e sentármonos onde séculos antes oraban os monxes que mantiñan o monopolio da cultura letrada. Paseamos polo claustro, subimos ao coro e revivimos o mundo no que se desenvolveu a infancia de tres dos meirandes escritores da nosa literatura.
   Na casa de Curros soubemos da súa vida atafegada e comprometida, do seu pai autoritario e da súa vocación temperán. Recitamos os seus poemas e usamos dos recursos que a Fundación que leva o seu nome puxo ao noso dispor para profundar na súa obra. Logo na biblioteca do Mosteiro, lembramos o poema escrito por Celso Emilio cando foi preso nas súas estancias polo réxime franquisa triunfante e que tan ben deixara descrito na súa “Longa noite de pedra”.
    Ao fin, polo serán chegamos a Santa Comba de Bande, unha pequena igrexa construída durante segunda metade do Século VII no estilo arquitectónico visigodo vixente no sudoeste da Europa nesta época. Santa Comba de Bande é a única igrexa deste período que se conserva na súa integridade.

    A beira desta igrexa atópase Aquis Querquennis, coñecido popularmente como A Cidá, foi un campamento romano situado nos Baños de Bande e ocupado entre o último cuarto do século I e mediados do II. Remontámonos milenios para pisar as ruínas do que fora un enclave fundamental para gardar a Vía XVIII ou Vía Nova, que comunicaba Bracara Augusta e Asturica Augusta. O Centro de Interpretación que abriron expresamente para a nosa visita axudounos a entender mellor as xentes que habitaran aquel lugar e moitas das inquedanzas que posuían e que dalgún xeito se manteñen na actualidade a respecto daquela globalización romana na que a nosa Terra temos abundantes vestixios.


23 jun. 2014

Contos do Museo 2014

O pasado venres  20 de xuño o alumnado de 1º ESO e 2º ESO achegouse á cidade de Lugo para visitar o Museo Provincial e realizar a actividade didáctica que xira en torno ao libro Contos do Museo.

   A saída didáctica a Lugo comezou cunha actividade que nos axudou de xeito lúdico a coñecer as xoias que garda o Museo Provincial desa cidade. O alumnado de 1º e 2º da ESO, logo de ler os relatos que servirían de base para a actividade, participaron nun concurso para desentrañar os misterios que se lle presentaron.
   Ao remate tivemos ocasión de visitar o centro de interpretación da Muralla, para entender mellor a visita que logo faríamos a esta, percorréndoa na súa case totalidade. A muralla de Lugo é unha fortificación que data do Imperio Romano situada na cidade de Lugo, en Galicia, sendo a única muralla destas características que se conserva no mundo. Comezou a súa construción probablemente contra o ano 260, ao medrar a importancia de Lucus Augusti como centro de comunicacións e comercial do norte peninsular. A devandita construción delongouse ata a época de Constantino, rematando sobre o ano 325.

   Pola tarde o alumnado tivo ocasión de navegar por unha das arterias fundamentais do noso país gozando das vistas que desde o rio se podían contemplar nas beiras frondosas do Miño.   



21 jun. 2014

A misterio da casa encantada

Cando alguén é quen de mobilizar a tanta xente para realizar un proxecto quere dicir dúas cousas: que ten moita paciencia e moito talento. Isto foi o que fixo Isabel, profesora de música do IES Chano Piñeiro, o pasado mércores 18 de maio con todo o seu alumnado para darlle forma a un conto musical que levou por título "O misterio da casa encantada".
Isabel con Jacobo, Rafa, Andrea,
Sofía e Lucía que exerceu de narradora
A idea xurdiu de Andrea, Sofía, Rafa e Jacobo catro alumnos de 1º de bacharelato que foron os que crearon, deron forma e puxeron en escena esta historia de misterios e pantasmas; das voces e dos instrumentos encargáronse o resto dos mozos e mozas de Música ata conseguir un espectáculo redondo que puidemos desfrutar profes, alumnos e pais do IES Chano Piñeiro e o alumnado e profesorado do CEIP Nosa Señora das Dores.
Parabéns para tod@s!

Isto é o que Isabel nos conta sobre a experiencia:
O Misterio da Casa Encantada, primeiro Conto Musical do IES Chano Piñeiro

      Supoño que cada docente pensará o mesmo da súa materia. De aí que eu, que estou na media, crea que ser profesor ou profesora de música é en Galicia un verdadeiro desafío, máis se traballas nun centro rural como o de Forcarei. Chega principio de curso e automaticamente se che transforma a cara nun sudoku musical onde tes que combinar en cada clase a alumnos con moita bagaxe que tocan nas bandas de música e gaitas da zona, con alumnos que (afortunadamente!!!) aínda lembran as aprendizaxes musicais do cole onde estudiaron primaria; alumnos que xa levan tres cursos contigo con alumnos cos que só estiveches un ano; alumnos de diversificación na mesma aula que os de ordinario,...
E entón pensas: “Uhhhhh!!!!!!”
Pero esto é en setembro. Antes, en agosto –coa tranquilidade das vacacións, o beneplácito da boa gastronomía e o pouso de interesantes conversas- empezas a darlle voltas ao curso e perfilas un proxecto musical que englobe a todos os teus alumnos. “Cantos máis participen, menos vergoña para as interpretacións”, pensas. Tamén te fixas en cada alumno, en que lle gusta, en que destaca, e lembras que vas volver a ter na túa aula estudiantes aos que lles gustaba escribir. Engades a todo esto a túa propia paixón pola ópera, musicais e teatro, e deixas que todas estas ideas te arrolen provocando un apracible e fermoso sono que finalmente se cumpre a finais de xuño. 

Deste xeito, vimos de estrear o primeiro mini-musical do Chano Piñeiro: O Misterio da Casa Encantada. (Preme encima do título se queres saber cal é o argumento do musical!). 

En realidade estábamos predestinados a esta actividade, desde que Les Misérables se estreou nos cines de Galicia en decembro de 2012, proxectamos o DVD en novembro de 2013 e asistimos algúns de nós ao musical que chegou a Vigo en febreiro deste ano. As imaxes e a música impactaron de tal forma que algo (ou todo) cambiou nos alumnos de 4º e Bacharelato, e a partir de aí todo foi moi fácil.

Sobre todo, pretendín que o noso conto fora en realidade o “Conto dos alumnos de Bacharelato”, que eles mesmos propuxeran, decidiran e levaran a cabo: tiveron a idea do argumento, escribiron boa parte dos diálogos, fixeron decorados, elixiron aos outros protagonistas, decidiron como se actuaba... O Departamento de Normalización Lingüística colaborou na coherencia e corrección do guión; Anxo (ademais) preparou o folley e xunto cos Departamentos de Francés e Filosofía responsabilizáronse de fotografía e camarógrafía; Marco, noso bedel de oído exquisito, reconverteuse en técnico de son; e desde o Departamento de Música, aportamos a Banda Sonora e a coordinación de toda a función.

Quedounos bastante operístico, argumentalmente coma se Verdi e Wagner fixeran mesa redonda con Carlos Ruiz Zafón e Isabel Allende. Ollo, só argumentalmente: no tocante á música resultamos... digámolo así... “bastante eclécticos”, xa que alternamos obras de coro de Antonio Garcia-Palao Redondo, cun fragmento de Les Misérables de Boblil e Schönberg; a versión de Gary Jules de Mad World, e un Vals instrumental de Brahms.

E mentres Lucía narraba o conto, Rafa, Andrea, Sofía e Jacobo representaban as diferentes escenas, ao tempo que todos os alumnos de música do IES Chano Piñeiro reforzaron os momentos máis dramáticos con obras musicais en diferentes estilos e linguas. Durante hora e cuarto, todos xuntos e ao mesmo tempo.

Sudoku resolto (para este curso). Veñen as vacacións... “Uhhhhh!!! Que apuntarán cara a setembro?”

20 jun. 2014

Publicidade en galego(II)

Como xa vos anticipabamos, velaí vai a seguinte tanda dos anuncios publicitarios realizados polo alumnado de 4º ESO:

Jonathan Rubia realizou este spot turístico do Concello de Forcarei:


Roberto Cerviño propónnos unha forma de poñerse en forma moi particular...


e, por último, Gabriel Otero e os seus cordóns luminosos!


19 jun. 2014

Constelación semántica Forcarei - Silleda

Forcarei e Silleda son dous concellos limítrofes. As vilas distan entre sí 15 quilómetros en liña recta e entre Cerdedo e Pazos hai 26 km. Unha distancia ben pequena! Porén, a riqueza semántica da nosa lingua é tal que xa en algo tan esencial para o noso agro como os apeiros de labranza atopamos diferenzas. E que dicir das partes do carro!
O alumnado de 4º ESO do IES Chano Piñeiro e o de 3º ESO-B do IES Pintor Colmeiro de Silleda andou a pescudar estes nomes. E David Cabaleiro aínda chegou máis alá, dánnonos a base do traballo que vos amosamos; música e presentación serviron de puntos de partida para este vídeo que ilumina o que nunca debemos perder: a nosa lingua.

De agasallo, cos apeiros vai asemade unha choiva de palabras molladas, un son característico de noso que agardamos o cambio climático non nos roube.

18 jun. 2014

Premiados!

Esta mañá entregamos os premios dos tres concursos que puxemos en marcha nas últimas semanas.

VI CONCURSO DE PROXECTOS EMPRENDEDORES. Concurso realizado en colaboración coa Asociación de Comerciantes e Empresarios de Forcarei (ACEF) e no que resultaron premiadas Noelia López e Alba Taín polo seu proxecto Grobas Termal.


III CONCURSO DE FOTOGRAFÍA MATEMÁTICA. Realizado en colaboración co Dpto. de Matemáticas e no que resultou gañadora Tamara López Álvarez de 3º PDC pola fotografía "As bágoas semiesféricas na parábola"




II CONCURSO DE ESOPÍAS. Resultou premiada a esopía escrita por Cristina Casado Gil de 2º ESO.
Sae o neno á tarde matinando en varios temas: "Sei facer ciencias, xeometría, álxebra". Dubidando ver na súa mocidade unha lingua de poetas ante nós



16 jun. 2014

Nós tamén contamos!

Esta mañá tivemos a segunda parte desta actividade que desenvolvimos en colaboración co CEIP Nosa Señora das Dores. se na primeira parte, eran os mozos e mozas do Club de Lectura os que representaban a obra "Os fillos do rei" para os cativos e cativas das aulas de Infantil, nesta ocasión o alumnado de 4º PDC achegouse á biblioteca do colexio para contarlle aos nenos e nenas de infantil e de 1º de Primaria algún conto clásico da literatura infantil sempre, iso si, con algunha modificación improvisada (non sempre os malos son tan malos!). A ratiña presumida, Os tres porquiños ou A rá tragona sacaron o sorriso agradecido dos máis pícaros do cole!


No próximo curso máis e mellor! Prometido queda!

13 jun. 2014

Publicidade en galego (I)

Velaquí vos deixamos os primeiros spots publicitarios creados polo alumnado de 4º ESO. Tratábase de ter unha boa idea, botarlle imaxinación e, por que non dicilo, botarse unha risas!
Isto foi o que saiu! (Ollo! Haberá segunda parte...)

María Duvale coa súa chocolatina que fai perder o sentido...


Dani Varela ofrece unha crema facial un tanto peculiar...


Gabriel Pazos danos a clave para mergullarse no mundo paranomal: o Pantasmeitor Plus


Carlos Penelas  ofrécenos as súas camisolas...picaronas!



7 jun. 2014

Contacontos: A Hora azul

O pasado xoves día 5 recibimos a visita de Marta e de Brais, A Tropa de Trapo, co seu espectáculo A Hora Azul.  Primeiro unha sesión de contacontos dirixida ao alumnado de 1º e 2º ESO coa música da guitarra portuguesa, do laúde árabe ou do caixón flamenco, con historias que veñen doutras culturas, doutros pobos. Despois, un obradoiro no que traballaron técnicas de expresión corporal, e faláronnos da importancia de escoitar, da forza intimidatoria da mirada, do traballo colectivo na creación dun conto...
Mágoa non dispor de máis tempo para desenvolver máis de vagar todas estas dinámicas teatrais que tanta valía teñen nas nosas vidas!
Pero, quen sabe, ao mellor os nosos camiños se poden volver cruzar noutra ocasión...

2 jun. 2014

Music-galeguízate: The Homens

Daniel Varela, de 4º ESO, achéganos o seu traballo sobre o grupo compostelá The Homens.


...e deixa un par de recomendacións da súa música:



1 jun. 2014

Ditos de aquí e de acolá!

O reto era recompilar refráns ou frases feitas na nosa lingua e atopar os seus equivalentes noutras linguas. A partir desa idea, o seguinte obxectivo era plasmar nunha imaxe ou nunha gravación ese dito. Non sempre se conqueriu, pero estas son algunhas das propostas para esta actividade feita polo alumnado de 2º ESO...

- Quen moito enfeixa, pouco ata!
- El que todo lo quiere, todo lo pierde.
- Grasp all, lose all.



- A todo porquiño, lle chega o seu San Martiño
- Everyone gets his comeuppance in the end

- Comer e rascar todo é empezar!


- Mexan por nós e temos que dicir que chove



- Chove a mares
- It´s raining cats and dogs!


- Ao que madruga, Deus o axuda
- Al que madruga, Dios le ayuda!
- The early bird catches the worm

30 may. 2014

Nicoleta en Proxecto Neo

Recibimos hai unhas semanas con certa sorpresa a chamada de Bernardo Penabade, un dos integrantes do grupo que leva adiante Proxecto NEO.
Preme na imaxe
Proxecto NEO é o programa radiofónico que resulta da colaboración entre a Área de Innovación Educativa do IES Perdouro de Burela e a emisora local desa localidade, Radio Burela. O programa ten como protagonistas aos neofalantes e quixeron contar coa presenza no seu programa de Nicoleta Rasuceanu, a nosa alumna de 1º de Bacharelato de orixe romanesa que foi a primeira protagonista de Desde o mundo a Forcarei, a serie de vídeos nos que o alumnado inmigrante ou emigrante retornado do noso centro fala da súa experiencia coa nosa lingua.

E así foi! A partir do minuto 19: 10 tedes a entrevista! 
PREME PARA ESCOITAR O AUDIO

29 may. 2014

Alén das fronteiras: O galego no Bierzo

Onte recibimos a visita no noso centro do profesor de Lingua e Literatura Galega Xosé Álvarez que lles impartiu ao alumnado de 41 ESO e 1º de Bacharelato unha charla sobre o galego na comarca do Bierzo. Xosé fora un dos precursores na implantación no programa de conservación da nosa lingua na rexión berciana e explicoulles aos mozos e mozas de Forcarei todas as dificultades e trabas que se foron atopando no camiño durante este proceso. Foron seis anos os que el estivo alí de profesor nos que, segundo as súas propias palabras, conseguiuse que os mozos e mozas que aprendían e falaban o galego se sentiran orgullosos de facelo.


Como un dos exemplos do que vos citaba anteriormente, deixovos este vídeo que Xosé nos ensinou e no que dúas rapazas do Bierzo, Alba e Henar, falan da súa historia co galego.

28 may. 2014

Os fillos do rei

Onte pola tarde tivemos teatro. Pero non foi unha representación calquera, para nada. Non faltaron os nervios, nin (pequenas) confusións, nin, por suposto, os aplausos do público. E que público!


Que como foi a cousa? Pois resulta que os mozos e mozas do Club de Lectura do IES representaron a obra "Os fillos do rei" para os nenos e nenas máis pequerrechos do CEIP Nosa Señora das Dores co que compartimos instalacións. E non só lle deron ao teatro, senón que os agasallaron cunha marabillosa coroa e compartiron uns minutiños sentados con eles entre contos, trouladas e sorrisos agradecidos.

E avisamos: a cousa non se vai quedar aí, xa que moi prontiño algúns rapaces do noso instituto irán de contada por algunha das aulas do colexio. Pero todo chegará no seu debido momento, permanecede atentos!

26 may. 2014

Desde o mundo a Forcarei: Mailín

Terceira entrega desta serie no que o alumnado do IES procedente doutros países nos fala sobre a súa experiencia coa nosa lingua. Neste caso, falamos con Mailín, alumna de 1º ESO que chegou a Galicia desde a súa Colombia natal.

22 may. 2014

Entre esopías e fotografía matemática

Un ano máis, o Equipo de Normalización organiza e colabora no desenvolvemento de dous concursos que, dunha maneira outra, teñen que ver coa matemática.

2º Concurso de Esopías: Tras o éxito do curso pasado, volvemos a lanzar de novo esta proposta na que teredes que construír microrelatos, poemas, comentarios...adaptando as palabras ao número de letras das sucesivas cifras do número Pi.  BASES

3º Concurso de Fotografía Matemática: Fai unha foto na que apareza reflectido algún concepto ou contido matemático; pensa un título orixinal EN GALEGO para esa imaxe e xa podes participar!  BASES

Cartel do 3º Concurso de Fotografía Matemática


O prazo de entrega dámbolos dous concursos remata 
o vindeiro 4 de xuño. 
ANÍMATE A PARTICIPAR!

20 may. 2014

Entre as pedras de Compostela

O pasado mércores 14 de maio o alumnado de 3º ESO desprazouse a Santiago para desenvolver a actividade "Entre as pedras de Compostela", unha visita didáctica á capital de Galicia na que a través de xogos de orientación e pesquisas os mozos e mozas descubriron moitos dos segredos da Cidade Histórica. Esta actividade fíxose en colaboración do Dpto. de CCSS.
Aquí vos deixamos algunha das xoias que descubriu o obxectivo da nosa fotógrafo particular, Tamara, alumna de 3º PDC.



17 may. 2014

Día das Letras no Chano Piñeiro

Onte, como anticipo da celebración hoxe do Día das Letras Galegas, fixemos un pequeno acto no instituto honrar a figura do homenaxeado deste ano, o poeta Xosé María Díaz Castro.


Recibimos a visita de David Otero, mestre de lingua galega do IES Nº 1 da Estrada, que nos falou do autor, das súas orixes, da súa obra, da súa forma de escribir... Pero tamén nos falou de palabras, desas pás que serven para labrar e que nos dan o poder de expresar todo o que a nosa mente sexa que de pensar ou imaxinar. E, como non, falou de lingua, da nosa lingua, e convidounos a sentírmonos orgullosos de tela, de falala, de compartila e de fornecela; porque, como ben lles dixo aos nosos alumnos e alumnas, eles son o futuro e os encargados de loitar por ela.



A charla desenvolveuse en dúas quendas e entre unha e outra asistimos ao recitado dalgún dos poemas de Xosé María Díaz Castro, rematando cunha escenificación do coñecido Penélope, na que a nosa tecelá particular elaboraba, entre verso e verso, a bandeira do noso país.

Velaquí vos deixamos as imaxes do acto.

15 may. 2014

Letras 2014: Todo sobre Xosé María Díaz Castro


Por quinto ano consecutivo a Coordinadora Galega de ENDL achéganos un completísimo portal con recursos, actividades e noticias sobre a figura homenaxeada no Día das Letras. Lembremos que xa o fixo así nos anos 2010 ( Uxío Novoneyra) , 2011 (Lois Pereiro) , 2012 (Valentín Paz Andrade) e 2013 (Roberto Vidal Bolaño).
A estrutura do portal segue as mesmas directices que a de edicións pasadas: desde a páxina principal do portal podemos acceder a distintos recursos ordenados coas etiquetas: Materiais didácticosPara saber máisBibliografía,LigazónsAudiovisualActividades dos centros,Arredor de Díaz Castro. Todo este material, xunto coa peneira de materiais feita  Botóns, son os mellores puntos de achegamento a Díaz Castro.

(Vía Carta Xeométrica)

E como mostra deste material, deixámosvos nun ano máis, o Telexornal adicado ao autor do CPI dos Dices de Rois:


14 may. 2014

Correlingua 2014



Como xa anunciamos hai uns días, o pasado luns 12 de maio, a rapazada da ESO do noso instituto acudiu á Estrada para participar, un ano máis, no Correlingua. Unha xornada primaveral na que centenares de nenos e nenas, mozos e mozas, manifestaron o seu interese pola defensa da nosa lingua e da nosa cultura, enchendo de cor as rúas da vila. Botamos en falta, un ano máis, algunha actividade complementaria na que a rapazada puidese participar activamente pero, ao fin de contas, o importante é estar onde se debe estar.
Ata o ano que vén!

12 may. 2014

Desde o mundo a Forcarei: Valentina

Segunda entrega desta serie que comezamos con Nicoleta e que continuamos con Valentina, alumna de 3º ESO de orixe venezolano e que leva cinco anos en Galicia; tempo suficiente para comunicarse na nosa lingua e reflexionar sobre ela.



11 may. 2014

Preparando o Correlingua

Un ano máis, mañá luns día 12 todo o alumnado da ESO achegarase á Estrada para formar parte do Correlingua 2014.
Baixo o lema de Galego, o paso adiante, centenares de xóvenes galegos unirán as súas forzas en prol da defensa da nosa lingua e disfrutarán dunha xornada festiva que virá acompañada pola música do grupo Quempallou.

Deixámosvos oa manifesto que alí se lerá, elaborado polo alumnado de 3º ESO do IES Isaac Días Pardo de Sada.
Vémonos no Correlingua!

GALEGO, O PASO ADIANTE
E nunca máis un paso atrás, NUNCA MÁIS!!!!
Trazamos un camiño
que arranca esta mañá co Cola-Cao e os cereais.
Bos días en galego, por que non?
Espreguízome con Doraemon, que saca do seu peto máxico o Xabarín Club.
Baixo os chanzos da escaleira, saio da casa co pé dereito, coa mochila e co noso galego.
E xa estou no mundo, no meu  mundo, no teu mundo galego!!
GALEGO,  O PASO ADIANTE
Miraremos atrás só para disfrutar do moito que avanzamos.
Os meus amigos espéranme na rúa,
- EH! Viches que cambiei o meu perfil?
Si, eu dei o paso adiante co galego.
A que esperas ti?
- Quen nos ía dicir que estaría ben  whassapear en galego!. Non si?
- Abofé que si.
GALEGO, O PASO ADIANTE
- Pincha hoxe mesmo no “hashtags”do teu Twitter: #GALEGO
e verás cantos estamos conectados no mundo.
GALEGO, O PASO ADIANTE
Esta nosa Penélope que  tece e tece no galego
e NUNCA DESTECE.
Paso a paso construímos un mundo novo, o noso mundo, o noso mundo futuro, co noso idioma galego. Somos NÓS os que decidimos onde empregalo,  alí onde vaiamos: no instituto, na vila ou  na cidade, tanto ten: virá con NÓS.
GALEGO, O PASO ADIANTE
Este fío invisible e forte que é a lingua vén ao noso carón alá onde vaiamos; ensinémoslla ao mundo en twiter, en facebook...
poñamos o xermolo en cada faro,en cada deserto,en cada estrada,en cada boca que desperta ao mundo.
GALEGO, O PASO ADIANTE
o paso que damos nós cara ao futuro,
nós, si
nós decidimos  empregar a nosa lingua.
GALEGO, O PASO ADIANTE
Nos camiños do mundo enteiro, haberá un corazón galego que latexará co noso acento: sen pudor, sen vergoña , sen prexuízos que abafen a nosa valentía e a nosa responsabilidade de representar a Galicia.
Porque nos une, porque nos fai máis fortes e porque nos identifica na “tea dos teus soños”  DÍAZ CASTRO. 

6 may. 2014

Bicos con lingua

Onte, 5 de maio, o alumnado de 3º e 4º ESO asistiu á representación de Bicos con lingua da compañía Talía Teatro. A obra, dirixida por Avelino González e protagonizada por Artur Trillo e Toño Casais profundiza, en tono de comedia, na situación sociolingüística de Galicia a partir de situacións da vida cotiá.



5 may. 2014

Music-galeguízate: Lamatumbá

Desta volta, Roberto Cerviño e María del Mar Duvale de 4º ESO achégannos a música do grupo ourensá Lamatumbá e os seus ritmos pegañentos ideais para mover o esquelete!


Velaquí vos deixamos un par de temas...




 ...e o video-clip creado por Mar do coñecido e festeiro tema Licor Café:

25 abr. 2014

Desde o mundo a Forcarei: Nicoleta

Baixo o título de Desde o mundo a Forcarei irémosvos mostrando unha serie de vídeos nos que o alumnado do IES Chano Piñeiro que veu doutros países fálannos sobre a súa experiencia persoal coa nosa lingua e reflexionan, en voz alta e desde o seu punto de vista, sobre como ven a situación actual do galego tanto na súa contorna como na sociedade en xeral. 

Comenzamos esta serie con Nicoleta Rasuceanu, alumna de 1º de Bacharelato que chegou hai oito anos da súa Romanía natal ata Soutelo de Montes.

24 abr. 2014

As orixes do noso baile tradicional

Seguindo a liña marcada coa visita de Suso Vaamonde, achegámonos outra vez ás nosas tradicións pero,
desta volta, centrándonos no baile e na riqueza do noso folclore.


Esta mañá recibimos a visita de Henrique Vázquez, membro da Agrupación Folclórica Tequexetéldere da Estrada, que lles explicou ao alumnado de 3º, 4ª ESO e 1º de bacharelato de todo o que rodea o baile tradicional galego centrándose especialmente na forma na que se fan as recollidas das distintas pezas musicais que eles reinterpretan nos seus espectáculos. E que mellor exemplo destas reinterpretacións que as que nos fixeron in situ tres pandereteiras do grupo a partir dos arquivos de audio orixinais das recollidas.





En definitiva, unha nova oportunidade que tiveron os nosos alumnos e alumnas de achegarse ás nosas tradicións.

23 abr. 2014

Día do libro

Desde hoxe e durante uns días a Biblioteca organizou unha exposición do gallo da celebración do Día do Libro na que, a través de paneis informativos, se explica a historia do libro. Dita exposoción vai acompañada por unha mostra dos distintos tipos de escrituras desenvolvidas ao longo da historia: desde a pedra ata a pluma pasando polo papiro. Para completar este traballo, podemos ler distintas recomendacións literarias feitas polos propios alumnos e alumnas.


A Biblioteca tamén quixo agasallarnos con libros e distribuinos aleatoriamente polo centro para que aquel que o quixera o levara para a casa. Por sorte, non chegamos a tempo para facerlle fotos a estes agasallos en forma de libro!

30 mar. 2014

Viaxe á porta do alén da man do escritor Carlos Solla

A montaña máxica do Monte Seixo

           O venres 28 de marzo, o alumnado de 4º da ESO e 3º PDC  percorremos da man do escritor Carlos Solla o chan sacro do cumio do Monte Seixo, un entorno máxico que durante séculos sedimentaron lendas populares a partir da orografía emocional e material do terreo, erguendo interpretacións do que alí acontecía, do que as pedras contaban e do que un podía albiscar alén do común grazas a situación elevada no que se atopa. Elevados no físico e no metafísico. Deixando pegada na conversa da comunidade que o circunda, e tamén reflexo na literatura máis universal a través de referencias nas Cantigas de Santa María de Afonso X o Sabio ou no veciño desta contorna Frei Martín Sarmiento.

         Carlos Solla fixo un traballo de recollida e investigación que nos permite hoxe mirar con outros ollos o que a simple vista puidera parecer unha poza ou un penedo. Coñecer o significado que tivo para quen habitou e visitou este espazo antes que nós, mais tamén desenterrar -cando menos coa mente- as persoas que viñeron dar cos seus ósos nesta necrópole co fin de ser lembrados e vivir eternamente no recordo da xente.

Un entorno natural -hoxe un parque eólico industrial- que a pesares da intervención agresiva e deshumanizada presente non puido borrar o rastro dun punto estratéxico na mirada secular dun pobo que usou de referencia para os seus ritos de sociabilidade e transcendencia que máis que supoñer un consolo particular para quen o practicaba, representou durante milenios o respecto a natureza para legado das xeracións futuras, un respecto que semella temos perdido e que quizais viaxes coma esta, coa compaña de guieiros tan sabios, nos axude a recuperar nas xeracións futuras.


29 mar. 2014

Music-galeguízate: Ruxe-Ruxe

Cólanse hoxe pola ventá de Music-Galeguízate o grupo compostelán de rock  Ruxe-Ruxe da man de Gabriel Otero e Carlos Penelas de 4º ESO. Disfrutádeos!




28 mar. 2014

Como cho digo!

Tras a exitosa campaña Gústame o galego, a Coordinadora de Trababallores/as de Normalización da Lingua (CTNL) vén de presentar estes días Como cho digo!.

Trátase dunha campaña para a visibilización da nosa lingua nos medios de comunicación. Calquera persoa ou entidade pode sumarse á iniciativa e recibirá unha declaración personalizada que poderá entregar aos medios no caso de participar nalgún evento que teña certa repercusión.


Máis información

13 mar. 2014

Día de Rosalía (e III)

Para rematar co acto-homenaxe a Rosalía, aquí achegamos o recitado de poemas que daba resposta ás palabras da escritora na entrevista que lle fixeron os profesionais de Telediver.

10 mar. 2014

Día de Rosalía (II) Silencio!

Por problemas técnicos non puidemos publicar antes as demais actividades desenvolvidas co gallo do Día de Rosalía pero, como máis vale tarde ca nunca, empezamos pola representación feita polo alumnado de 3º ESO e 1º Bacharelato da materia de Música que escenificaron a adaptación do poema Silencio de Follas Novas. Dita adaptación foi realizada pola súa profe Isabel García.


E permanecede atentos porque haberá máis sorpresas antes de rematar o curso!

7 mar. 2014

Music-galeguízate: Zënzar

Desta volta, Jonathan Rubia e Gabriel Pazos de 4º ESO achégannos a música da banda de rock Zënzar.


E velaquí un par dos seus temas:


24 feb. 2014

Dia de Rosalía (I)

Esta mañá vivimos a nosa particular homenaxe a Rosalía. Un acto no que participaron, dunha forma directa ou indirecta, máis de 80 mozos e mozas e que serviu para achegarnos un pouco máis á figura máis importante das nosas letras.

Comezamos o acto cunha marabillosa dramatización musicada do poema Silencio que representaron un grupo de alumnos guiados pola súa profe de música Isabel.

A man nerviosa e palpitante o seo,

as niebras nos meus ollos condensadas,
con un mundo de dudas nos sentidos
i un mundo de tormentos nas entrañas,
sentindo cómo loitan
en sin igual batalla
inmortales deseios que atormentan
e rencores que matan,
mollo na propia sangre a dura pruma
rompendo a vena hinchada,
i escribo..., escribo..., ¿para qué? ¡Volvede
ó máis fondo da ialma,
tempestosas imaxes!
¡Ide a morar cas mortas relembranzas!
¡Que a man tembrosa no papel só escriba
palabras, e palabras, e palabras!
Da idea a forma inmaculada e pura
¿dónde quedóu velada?


A continuación, chegou o momento da entrevista que lle fixemos a nosa particular Rosalía. Así, mentras a autora nos falaba da súa obra, das súas inquedanzas e da súa vida, asistimos ao recitado dalgúns dos seus poemas. Velaquí vos deixamos a viaxe no tempo que fixo Lino, un dos reporteiros de Telediver, para levar a cabo entrevista:




Para rematar, proxectamos o vídeo que vos mostramos a continuación no que, verso a verso, frase a frase, palabra a palabra, recitamos  "A Xustiza pola man".


Por suposto, nos próximos días agardamos poder mostrarvos en imaxes todo o que esta mañá vivimos.